oleh

SARAPAN PECEL SEGO CAWUK TEMENGGUNGAN.

Spread the love

Isuk -isuk pas weteng kroso elom ngliwati kutho Banyuwangi hang buru baen tangi turu, seng kangelan arep goled sarapan.

Biyasae kadung sarapane poro manula iku cukup ketan,gedhang goreng lan kopi. Krono wetenge wes gendingan koyo orkestra hang nak tampil, isun keloron nuju tengahe jantung kutho Banyuwangi Belukan Taman Sritanjung sisih pojok wetan lor, pas nong totokan belukan kenceng nong gang mlebu Temenggungan,beluk nengen sithik terus kenceng ngiwo. Kiro-kiro seket meteran nong kiwo dalan ono kantor kelurahan deso Temenggungan. Jarak telung blok umah,  pitt dijagrak sagah geno heng uwah.

IMG-20210621-WA0009

Nong tengen dalan ono rombong sego cawuk, pecel lan jajanan pasaran, cenil lupis, awuk, orog2, jenang glimpang, serabi, lanun jangkep ambi gulo juruhe.

Hang sarapan isuk podo antri, ono hang dibungkus, diethuk godhong, diwadai ingke lan piring. Sego cawuk/sego janganan khas Banyuwangi ubo rampene hang jangkep iku ono pelasan tamban/putian, ndog cit, trancam timun jagung/ kerawuan jangan kelopo, sambel kemiri tomat lan gecok gerang topinge kerupuk kanji.

Sak piringe murah cukup rego sepuluh ewu rupiyah baen. Kadung ditambah janganan sambel pecel totale rolas ewu rupiyah. Madyang esuk -esuk nong Temenggungan howone keroso seger, asri, akeh tanduran hang dinggo stigeran /pageran kiwo tengen nong dalan kampung iku. Lomoho ta ono mertuo liwat jare wong umume mesthi seng katon,mergo saking enake panganan hang diadhepi.

 

IMG-20210621-WA0008

Seng usah bingung mikir papan pelungguhan milih methik arep nong ngarepe rombong, mejogrok nang pojok dalan lungguh jodhok/buk watesane dalan, utowo nong ngarepe rombong seseh kiwo dalan teritisane umae bakul wedang kopi, teh hang mage beroyone bakul sego cawuk.

Kolaborasi hang apik kanggo njogo paseduluran sanak kadhang dum-dum rejeki isuk hang barokah kanggo njogo langgenge urip bebrayan nong tengae krisis pabdemi iki.

Mbok Jum lan mbok Atun,awake subur mergo atine ikhlas ngladeni wong sarapan ngombe hang mampir subuh, isuk, awan kanggo ngisi amunisi daerah tengah geno konsere sedino-dino biso lancar,berjuang golet upo lan bondho jajahi bumi nuswantoro.

Mbok Prih, bek Sul wong asli Temenggungan ngarep gang ambi nyangking blonjoan teko wlijo hang jojo liwat kampung yo buru baen namataken sarapan isuke nong warung sego kiwo kelurahan hang dadi icon kampung Temenggungan,gudange poro seniman Banyuwangi Catur Arum, Candra Banyu,Epeng – Eko, Kang Wang Angklung, Cak Andik, Ugo markase Bathik asli Banyuwangi Sayu Wiwit (Alm. pak Oyo)

Total entek picis telung puluh enem ewu rupiah, sak porsi sego cawuk original, sak porsi sego pecel cawuk, 2 gelas teh anget wes cukup kanggo amunisi kekuwatan sangu moleh nyebrang segoro nuju bumi dewata.

Pitt distater donga Bismillahi tawakaltu Allalloh Lahawla walla quwata illa billah hun keloron ninggalaken kampung Temenggungan hang wes kroso anget disorot serngenge teko pucuk wetan.
(Ambarwati Soenarko).